ကာဒ်ဂကောံဟံၚ်ပြာ်မန်

အာယုက်ကာဒ် - ၁ သၞာံ
ၚုဟ်မးကာဒ် - ၁၂၀ ရေန်ဂေတ်
ဆက်ကာဒ်အာယုက်အိုတ် - ၆၀ ရေန်ဂေတ်
ဆက်ကာဒ်အာယုက်အိုတ်လောန်ၜက်အာ(၃)ဂိတု - ၁၂၀ ရေန်ဂေတ်
က္လေၚ်ပ္တိတ်ကာဒ်ကၠေံ/ကဝ် - ၃၀ ရေန်ဂေတ်

စေဝ်ပၞောန် ကေုာံ အခေါၚ်အရာ ဂွံဒုၚ်စသိုၚ် ကာဒ်မန်

ကာတ်မန်ဝွံ ဒှ်ကာတ် ဂကောံဟံၚ်ပြာ်မန်-ဍုၚ်မလေဝ်ယှာ၊ ကောန်ဂကူမန်တန်တဴဒၟံၚ် လ္တူဍုၚ်မလေဝ်ယှာတံ ဂွံနွံကဵု ဂီုကၠီုၜိုတ်ထေက်ကြိုက်၊ ဂွံရီုဗၚ်ဟံၚ်ပြာ်ထ္ၜလ္ဘာ်ညးသ္ကအ်ၜိုတ်ထေက်ကြိုက်မာန်၊ ညးမနွံကဵုရန်တၟံ တိတ်ဍုၚ်သၟာၚ် နကဵုအစဳအဇန် ကောန်ညးဒှ်ဒဒိုက်တံ ဂွံကလိဂွံအခေါၚ် သွက်သ္ဒးဒုၚ်သ္ပသမ္တီ ကု (UNHCR) မာန် ရန်တၟံတုဲ ကၠောန်ပတိတ်လဝ်ရ။ တုဲပၠန် ဂကူမန်ပိုဲ ညးမရပ်လဝ်ကာတ်မန်တံ မံၚ်စဟွံမိပ်တုဲ ကာလဒးတိုန်ရုၚ်ဂဥုဲမ္ဂး နကဵုကာတ်မန်ဏံ တိုန်စိုပ်ရုၚ်ဂဥုဲ မာန်၊ ကာတ်ဇကုယဝ်အာယုက်ဟွံအိုတ်မ္ဂး ခရိတ်ဂဥုဲဇဗဇကုအိုတ်လဝ်တံဂှ် နူကဵုရုၚ်ရီုဗၚ်ထံက်ပၚ်ကဵုမံၚ် အတိုၚ်သၞောတ်ဗၜတ်ဓမံက်ထ္ၜးလဝ်ဗွဲသၟဝ်တေံ အခေါၚ်ဒုၚ်စသိုၚ်နွံရောၚ်။ ကာလဒးဒုၚ်ရပ်ကဵုဗၠာဲသၟိၚ်တံမ္ဂး ညးတာလျိုၚ် နူကဵုရုၚ်ဟံၚ်ပြာ်မန်တံ ၜိုတ်သ္ပမာန် ရုန်ဂ္စာန်ရီုဗၚ် ဘိုၚ်ဗက် သောၚ်ကလး ရေၚ်တၠုၚ်ကဵုမံၚ်ကီုရ။

သုၚ်စောဲကာဒ်မန်တုဲ အရာဟွံထေက်ကဵုကၠောန်သ္ပ

၁။	သုၚ်စောဲကာတ်မန်တုဲ ပွမကူသာန်သွံရာန်စ ဂဥုဲဝိဝိၚ် ကေုာံ လွဟ်လၞက်ဟွံဂွံ။
၂။	သုၚ်စောဲကာတ်မန်တုဲ ပွမကၠတ်ဂၠံက်ဒြပ်ညး၊ ပွမပလီုပလာ်ကောန်သမ္ဘာညး၊ ပွမၜုၚ်တက် ဂစိုတ်ညးသ္အာၚ် ကၠောန်သ္ပဟွံဂွံ။
၃။	သုၚ်စောဲကာတ်မန်တုဲ ပွမဖံက်ပ္ကဝ်အခေါၚ်အရာမၞိဟ်ကီု၊ ပွမကၠတ်ပၠောပ်မၞိဟ်ဟွံမွဲကဵုဗဗွဲဓဝ်ကီု ကၠောန်သ္ပဟွံဂွံ။
၄။	သုၚ်စောဲကာတ်မန်တုဲ ပွမဟီုပျုတ်ဗ္ဒေက်ညး၊ စဴၜေဟ်စညး၊ လီဠာန်ညး၊ သေက်ဇဵုတက်ပရဲလ္တူညး ကၠောန်သ္ပဟွံဂွံ။
၅။	သုၚ်စောဲကာတ်မန်တုဲ ပွမပါ်ပရးဂကောံ ဂကူဇကုကီု၊ ကမၠောန်ဗၠေတ်နူကဵုသၞောဝ်ဍုၚ်မလေဝ်ယှာကီု ကၠောန်သ္ပဟွံဂွံရ။
	ယြဴပူဂဵုမွဲ ယဝ်ရကလိလောန်အာဒုဟ် အတိုၚ်စေဝ်ပၞောန်လ္တူတေံ ပေၚ်အာ(၃)ဝါမ္ဂး ကာဒ်ဂှ် ညးတာလျိုၚ်တံ သီကေတ်တုဲ ပူဂဵုဂှ် ဒးဒုၚ်နုက်တိတ်နူဒဒှ်ကောန်ဂကောံရောၚ်။

ဖဵုရပ်စပ်သုၚ်စောဲကာဒ်မန် (အာယုက်ဟွံအိုတ်ဏီ)

၁။	အခေါၚ်ထ္ၜးရုၚ်ဂဥုဲနွံ၊ အခေါၚ်ကလိဂွံဒုၚ်စသိုၚ် ပရေၚ်ထံက်ပၚ်နူဂကောံဟံၚ်ပြာ်မန်-ဍုၚ်မလေဝ်ယှာ နွံရောၚ်။
၂။	ဒးဒုၚ်ရပ်စပ်ကဵုဗၠာဲသၟိၚ် (POLICE) ဍုၚ်မလေဝ်ယှာဏံမ္ဂး အခေါၚ်သဳကၠဳပ္ညဳပ္ညပ်နွံတုဲ ရပ်လဝ်ကာဒ်မန် ဍာံစၟတ်မ္ဂး နူရုၚ် ဗက်နုက်ပတိတ်ကဵုရောၚ်။
၃။	နကဵုနဲကဲဍိုဟ်ကေက် အခေါၚ်အာတ်ကၠောန်ကမၠောန်နွံတုဲ သေဌဳနွံပၟိက်မိက်သ္ဂောံသၟာန်မွဲမွဲသာ်မ္ဂး ကေတ်အဆက်ကဵုရုၚ်ဟံၚ်ပြာ်မန် အတိုၚ်ထမံက်လဝ်ဂၞန်စက် ပ္ဍဲလ္ပာ်လက္ကရဴစးကာဒ်မန်ဂှ်မာန်ရောၚ်။

အခေါၚ်အရာဂွံဒုၚ်စသိုၚ် စပ်ကဵုပရေၚ်ဂီုကၠီု

၁။	ကောန်ဂကောံတံ ဒးဒုၚ်ရပ်ကဵုဗၠာဲသၟိၚ်တုဲ စိုပ်အာရုၚ်ဗၠာဲသၟိၚ်လ္တူဍုၚ်တုဲ က္လေၚ်နုက်ပတိတ်နၚ်မ္ဂး နူကဵုဂကောံ ထံက်ပၚ်ကဵုသြန် (၅၀) ရေန်ဂေတ်ရောၚ်။
၂။	ကောန်ဂကောံတံ ဒးဒုၚ်ရပ်ကဵုဗၠာဲသၟိၚ်တုဲ စိုပ်အာထံၚ်ကီု၊ ပလံၚ်စိုပ်ပယျဵုက္လေၚ်တိုန်ကၠုၚ် ဍုၚ်မလေဝ်ယှာမ္ဂး နူကဵုဂကောံ ထံက်ပၚ်ကဵုသြန် (၁၀၀) ရေန်ဂေတ်ရောၚ်။

တၚ်စၟတ်

၁။	ကောန်ဂကောံတံ ဒးဒုၚ်ရပ်ကဵုဗၠာဲသၟိၚ်အကြာဂၠံၚ်ဍာန်တုဲ နကဵုနဲကဲဇကု သောၚ်ကလးတုဲဗၠးတိတ်အာဂှ် နူကဵုရုၚ် ဟွံဒးကဵုအထံက်ပၚ်သြန်ရောၚ်။
၂။	ကောန်ဂကောံတံ ဒးဒုၚ်ရပ်ကဵုဗၠာဲသၟိၚ်တုဲ စိုပ်မံၚ်ရုၚ်လဵု၊ အချုက်လဵု၊ ထံၚ်လဵု၊ မုက်ဂၞန်ထံၚ်မူစိ၊ သ္ဒးလဴကဵုသမ္တီ ကုရုၚ်ဟံၚ်ပြာ်မန်ရောၚ်။
၃။	ကောန်ဂကောံရပ်လဝ်ကာဒ်မန်အာယုက်အိုတ်(ကာဒ်ချိုတ်မံၚ်) တံ ဟွံမွဲကဵုအခေါၚ်ဒုၚ်စသိုၚ် အတိုၚ်ဗွဲလ္တူ တေံရောၚ်။ ယဝ်ခါရအာတ်မိက်စိုပ်ကၠုၚ်မ္ဂး နကဵုစိုတ်ဓါတ်ဆာန်ဂကူဟေၚ် ရေၚ်တၠုၚ်ကဵုရောၚ်။

အခေါၚ်အရာဂွံဒုၚ်စသိုၚ် စပ်ကဵုပရေၚ်ထတ်ယုက်

၁။	ကောန်ဂကောံတံယဲဒိုက်၊ မံၚ်ဟွံမိပ်တုဲ ဒးအာရုၚ်ဂဥုဲမ္ဂး နူရုၚ်ပလံၚ်ဗစိုပ်ရေၚ်တၠုၚ်ကဵုရောၚ်။
၂။	ကောန်ဂကောံတံ ဒးအာရုၚ်ဂဥုဲမ္ဂး ဗၞတ်(၃)ဝါ နူရုၚ်ပ္တိတ်ပလံၚ်ပ္တိတ်ကဵုစရိတ်ဂၠံၚ်တုဲ ပေၚ်အာ(၃)ဝါတုဲမ္ဂး နူရုၚ်ဟွံပတိတ်ကဵုစရိတ်ဂၠံၚ်ရ။ ယဝ်ရအာတ်အရီုအဗၚ် သွက်ဂွံပလံၚ်ဗစိုပ်ကဵုရုၚ်ဂဥုဲမ္ဂး ညးတာလျိုၚ်နူရုၚ်တံ ကမၠောန်သၠးမ္ဂးပလံၚ်ဗစိုပ်ကဵုရောၚ်။
၃။	ကောန်ဂကောံတံ ဒးတိုန်ရုၚ်ဂဥုဲ လွဳယဲတုဲ ယဝ်သြန်အိုတ်အာ မွဲဠက် (၁၀၀၀၀) ရေန်ဂေတ်လ္ပာ်လ္တူမ္ဂး နူဂကောံထံက်ပၚ်ကဵု သြန် (၂၀၀၀) ရေန်ဂေတ်ရောၚ်။
၄။	ကောန်ဂကောံတံ ဒးတိုန်ရုၚ်ဂဥုဲ လွဳယဲတုဲ ယဝ်သြန်အိုတ်အာ အကြာမွဲဠက် (၁၀၀၀၀) ကဵု မသုန်လ္ၚီ (၅၀၀၀) ရေန်ဂေတ်မ္ဂး နူဂကောံထံက်ပၚ်ကဵု သြန် (၁၅၀၀) ရေန်ဂေတ်ရောၚ်။
၅။	ကောန်ဂကောံတံ ဒးတိုန်ရုၚ်ဂဥုဲ လွဳယဲတုဲ ယဝ်ရသြန်အိုတ်အာ မသုန်လ္ၚီ (၅၀၀၀) ရေန်ဂေတ် လ္ပာ်သၟဝ်မ္ဂး နူဂကောံထံက်ပၚ်ကဵု သြန် (၃၀ %) က္ဍိုပ်ကၠံ ရေန်ဂေတ်ရောၚ်။
၆။	သြန်အိုတ်လဝ်တံ ယဝ်ကလိဂွံနၚ်လဝ် အထံက်ပၚ် နူကဵုညးတၠဒါန်မွဲကဆံၚ်တုဲမံၚ်ရမ္ဂး (၃၀%) က္ဍိုပ်ကၠံဂှ် နူရုၚ် ဟွံထံက်ပၚ်ကဵုရောၚ်။

တၚ်စၟတ်-

အာယုက်ကာဒ်မန်ဝွံ စနူကဵုတ္ၚဲကၠောန်ပတိတ်ကာဒ်တုဲ ပေၚ်(၃)ဂိတုဟေၚ် အခေါၚ်ဒုၚ်စသိုၚ် သြန်ထံက်ပၚ်နွံရောၚ်။