ဂကောံဟံၚ်ြပာ်မန် ကၠောန်ဗဒှ်ဏာပေါဲရုဲမာဲ သၞာံ ၂၀၁၄

 ပ္ဍဲစၟတ်တ္ၚဲ ၂၀ ဂိတု ဨပြေဝ် ၂၀၁၄ ဂှ် ဂကောံဟံၚ်ြပာ်မန် ကၠောန်ဗဒှ်ဏာ ပေဲါရုဲမာဲ သၞာံ ၂၀၁၄ ပ္ဍဲဘာပူတူ မၞုံလ္တူဍုၚ်ဇၞော်ကွာလာလာမ်ပူဂှ်ရ။ ပ္ဍဲသ္ဘၚ်ပေဲါရုဲမာဲဝွံ ခမဳသၚ် ကေုာံ ညးဆာန်ဂကူမန်တံ လၟိဟ်ၜိုတ် ၇၀ တၠပြၚ်ၚ် တိုန်စိုပ်ကဵုဇြဟတ်တုဲ ပ္ဍဲအခိၚ် ၁၂ နာဍဳ လဒေါဝ်တ္ရဲဂှ် စပံက်ဏာအခန်ကၞာ ပေဲါရုဲမာဲဂှ်ရ။ ပ္ဍဲဂှ် သ္ဂံၚ်ဗော်ဍုၚ်မန်တၟိတြေံ နာဲဂံၚ်သ္ကာ ကေတ်ဏာတာလျိုၚ် နဒဒှ်သ္ကိုပ်အသေဟာန်တုဲ နကဵုသဘာပတိ ၅-တၠ ကေုာံ ဂကောံကမ္မရှေန် ၄-တၠတံ ရေၚ်တၠုၚ်ဏာသ္ဘၚ်ပေဲါရုဲမာဲဝွံရ။ ဗွဲကိုပ်ကၠာ တၠဂုဏ်အ္စာထာဝရ နွံပိုန်ဘာသၞေဟ်ဂၠုၚ် ဟီုဏာဂလာန်သြဝါဒတုဲ မွဲအဆက်ဓဝ် ဥက္ကဋ္ဌဂကောံပံၚ်ကောံမန်မလေဝ်ယှာ နာဲအကးပေၚ်ဟီုဏာဂလာန် တုဲပၠန် ဥက္ကဋ္ဌဂကောံဟံၚ်ြပာ်မန်တြေံ နာဲသာၚ်ဝဏ္ဏ ဟီုဏာဂလာန်စပ်ကဵုပေဲါရုဲမာဲ အဆက်ဂှ်ပၠန် ညးအုပ်ကာဂကောံဟံၚ်ြပာ်မန်တြေံ နာဲဇၟန်ရတ် ဗှ်ထ္ၜးဏာလိက်ဒုၚ်စဳရေၚ်ပွိုၚ်ၜါသၞာံတုဲ ကြဴနူဂှ် သီုကဵုဏာအခေါၚ်ကုပုရိသာတ်တိုန်စိုပ်တံ ကဏ္ဍသၟာန်သွဟ် စပ်ကဵုပရေၚ်ကမၠောန်ဂကောံဟံၚ်ြပာ်မန်နာနာတုဲ ကမ္မတဳတြေံညးမဆက်စပ်တံ က္လေၚ်သွဟ်ဏာကဵု ဗွဲမဗဗွဲကဵုတာလျိုၚ်ညးကဵုညးအိုတ်ရ။ ကိုပ်ကၠာဟွံဂွံရုဲမာဲဏီ သ္ဂံၚ်ဗော်ဍုၚ်မန်တၟိတြေံ ကမ္မတဳခရိုၚ်လေဝ်ဒှ် နာဲရာမညအီဆာဲ ဗှ်ထ္ၜးဏာကဵုစေဝ်ပၞောန် ကေုာံ အခေါၚ်ဒုၚ်စသိုၚ် စပ်ကဵုညးတာလျိုၚ်ဒုၚ်ရုဲမာဲတံတုဲ ၜိုတ်အခိၚ် ၃ နာဍဳပြၚ်ၚ်ဂှ် စရုဲအာမာဲနကဵုသၞောတ်ဒဳမဝ်ခရေဇြဳစှေ်စှေ်တုဲ အခိၚ်သဝ်တ္ၚဲ ၆:၄၅ နာဍီဂှ် ပေါဲရုဲမာဲဂကောံဟံၚ်ြပာ်မန် ဍုၚ်မလေဝ်ယှာ တုဲဒှ်အာဗွဲမအံၚ်ဇၞးတုဲ က္လိဂွံညးတာလျိုၚ်တၟိ အတိုၚ်သၟဝ်ဝွံရ။

  ၁။  နာဲသာၚ်ဝဏ္ဏ (ဥက္ကဋ္ဌ)
  ၂။  နာဲမြဟ်စိုတ် (ဒု-ဥက္ကဋ္ဌ)
  ၃။  နာဲဆာန်မန်-ဇၞော် (ညးအုပ်ကာ-ယာယဳ)
  ၄။  နာဲကယျိုၚ်မန် (ဖက်ဆောညးအုပ်ကာ ကေုာံ ပရိုၚ်)
  ၅။  မိမၞိက်ရတ် (ဂအုပ်ရုၚ်)
  ၆။  နာဲထောန်ထောန် (လျိုၚ်ပရေၚ်ထတ်ယုက်)
  ၇။  နာဲဝၚ်မန် (လျိုၚ်ဂီုကၠီု)
  ၈။  နာဲတၠမန်ဟံသာ (လျိုၚ်ဘဏ္ဍာ)
  ၉။  နာဲဆာန်မန်-ဍောတ် (လျိုၚ်ကၠောန်ကာဒ် ကေုာံ ခမ်ပျူတာ)
၁၀။  မိနန္ဒာ (ဂအုပ်ဘာပရေၚ်ပညာ ကေုာံ ယေန်သၞာၚ်)
၁၁။  မိသိုက်ဉာဏ် (လျိုၚ်ပရေၚ်ပညာ)