ညးမရာန်သုၚ်ၜံက် ဟွံလေပ်ကဵုသၞောဝ်တံ ဒးဒဏ်သြန် ကေုာံ ထံၚ် မာန်မံၚ်

ယဝ်ရာန်သုၚ်ၜံက်ဟွံလေပ်ကဵုသၞောဝ်မ္ဂး ဗွဲမဗဗွဲကဵုသၞောဝ်ဥပဒေတၟိ ဒးဒဏ်သြန် ဟွံသေၚ်မ္ဂး ဒးဒုၚ်ထံၚ်မာန်မံၚ်ရ။ ပ္ဍဲကဵုသၞောဝ် ကလေၚ်ပလေဝ်လဝ် နူကဵုသၞောဝ်စပ်ကဵုၜံက်ပ္တိတ်လဝ် ၂၀၀၄ တေံ ပ္ဍဲကဵုသၟဝ်ဥပဒေစၞစမထ္ၜးလဝ်တေံဂှ် သွက်ညးသွံတံသၟးဟွံသေၚ် သွက်ညးရာန်သုၚ်ၜံက် ဟွံဗာန်လဝ်ရုပ်ကဵုသတိပရေၚ်ထတ်ယုက် တံလေဝ် ဟွံလေပ်ကဵုသၞောဝ်ရောၚ်။ အတိုၚ်သၞောဝ်ကလေၚ်ပလေဝ်လဝ် ပ္ဍဲကဵုဂိတု June တုဲကၠုၚ်ဏံဂှ်တှေ် ညးရာန်သုၚ်ၜံက်တံလေဝ် ညံၚ်ရဴမၞိဟ်သွံကီု ရပ်ဂွံမ္ဂး ဒးဒဏ်သြန် RM 10,000 ကေုာံ ထံၚ်စဵုကဵု ၂-သၞာံ ဟွံသေၚ်တှေ် သီုၜါသာ်လေဝ် ဒှ်မာန်ရ။ သၞောဝ်တၟိဏံဂှ် ဒှ်အရာမစၟဳစၟတ်ဂၠိုက်ဂၠာဲကဵု ပွမပၠောပ်ကပေါတ်ဟွံလေပ်ကဵုသၞောဝ် စပ်ကဵုၜံက်ပ္ဍဲဍုၚ်တံရ။ ၜံက်မကၠောန်ပ္တိတ်မံၚ် ပ္ဍဲဍုၚ်မလေဝ်ယှာဂမၠိုၚ် ဗာန်ကၠုၚ်မံၚ်ရုပ်မကဵုသတိပရေၚ်ထတ်ယုက်တံဂၠိုၚ်ကၠုၚ်ကဵုသၞာံရတှေ် ၜံက်ဟွံမွဲကဵု ရုပ်တံဂှ် ဒှ်ၜံက်ပၠောပ်နၚ်လဝ် ဟွံလေပ်ကဵုသၞောဝ်ဟေၚ်ရ။ နဲလဵုဒှ်ဒှ် ညံၚ်ဂွံထမံက်ပ္တိတ်ဖျာ မသွံၜံက်ကမၠတ်တံမာန်ဂှ် ပိုဲတံရီုဗၚ်အာဌာနဝန်ဇၞော်ပရေၚ်ထတ်ယုက်တံရောၚ် သာ်ဝွံ ခါဇာလဳ(Khazali) ဟီုရ။ နူဌာနမဆက်စပ်တံလေဝ် နူသၞာံ ၂၀၁၁ တေံ ရပ်ဂွံကၠုၚ်လဝ်ၜံက်ကမၠတ် 1.6 billion တၞုၚ်ြပၚ်ၚ် မထေက်တန်ကဵုၚုဟ်မး RM 134 Million ရောၚ်။ "ညံၚ်ဂွံဒစဵုဒစးဖအိုတ်ကၠေံၜံက်ကမၠတ်တံမာန်ဂှ် ပိုဲတံဂစာန်ကၠောန်သၠုၚ်ပ္တိုန်မံၚ်အသိၚ်ယျ" သာ်ဝွံ ညးထပ်ဟီုဏာရ။ ပ္ဍဲလ္တူဂၠးကဝ်ဏံ ဍုၚ်လေဝ်ယှာဝွံ ပ္ဍဲအရာသုၚ်စောဲၜံက်ဟွံလေပ်ကဵုသၞောဝ်ဂှ် ဂွံလဝ်က္ဆံၚ်လ္တူအိုတ်ရောၚ် သာ်ဝွံ နူကုမ္ပဏဳ British American Tobacco တေံ ထမံက်ထ္ၜးလဝ် ပ္ဍဲဂိတု September တုဲကၠုၚ်တေံရ။

Ref: The Star News